Utxisa uspanru Didza Xidza!
Txi guka tsuna iza gudela runa skwela ki Didza Xidza.
Na rudu iza galaj gaywa yu’u galaj gudelatu runtu tu kursu ga ulusedaka bunatxi iline Didza Xidza kieru.
Xunutxizka bunatxi gudake na gudelatu. Bwikiaj iza nara guka nayaa. Bentu lei tu yubla iza galaj gaywa yu’u tu urwa.
Gude txi urwa ka bunatxi buzwa kwinke lu gitxi ki ga’ke lu kursu ki Didza Xidza.
Orna gudelatu runtu lei txupa lizu tu iza, yugu iza. Txi guka xunu lizu rulu’a Didza Xidza.
Idu txi urwa ka bunatxi txi guda’ka yugu lizu txi bentu lei. Raka xbaa yugu iza guna kursu ni, sa ilaa txa wayu’u len ki.
Txiguka kiki iza galaj gaywa yu’u txupa, len tsuna, len tapa urwa.
Sa ilaa bi gun iza zaa, iza galaj gaywa yu’u gayu urwa. Iládzga bala bunatxi ilidxin. Iza na’a gu’nitu isalajtu tsuna grupu, ati tuz blí.
Ta zaa re’nitu isalajtu tsuna yubla kaa, na ilaa txa walíka yugute.
Lazka iza gudëdi gusalajtu yu’u tu liben ki kursu ni. Tuz ga rizloru rulwitu zi’ala.
Ati iza gudëdi gudelatu rulwitu yu lati tu baniga kika bunatxi na txi gulizwa gana rigelaru.
Kursu ni runtu lei lu interne, runitu dxin zum; naa rkwatu rwitu didza len rusedatu gaka rnaru bipa twa len Didza Xidza.
Yuguka bunatxi ra’ka lu kursu ni tagixajka lati dumi, nade xupaga gaywa zua na’a.
Tuni runitu lei dxin rigixhajtu yugu tu riyadzaj ki gaka skwela ni.
Tibi nu run netu kulen ki guntu kursu ni, tibi nu rgixhaj netu; tibi nu runa kietu dumi.
Tuzkaz dumi doo na tagixajkabe be ta’be tusedabe naka tu ridubi kietu.
Bixke na rulwitu Didza Xidza?
Netuní rinatu ki rala utxisa uspanru didza kieru. Tibi rala uderu lataj ki ulazka didza kieka bëni gula kieru.
Yëdzi zian nakwaa ga tibira taneka bunatxi Didza Xidza. Ati tuwinibe bekwidi ki xuzxnakabe tibi bulwikine lakabe xtidzake.
Tu zian guka dzanite, tu zian bulutsaga xuzxnaru ni’ki tu gulinee Didza Xidza.
Butitajke lake, buluxhidxiki lake yazikala bunatxi tun ba xhën, tu tun ba rajni’i.
Len laska bëni xtila, len yugu bunatxi tanabee, bululeaj bulibike bunatxi waladza kieru ni’i ki tu kabi tanee didza Xtila.
Tu zian guka kieke, beeke kieke dëë o busaka buki’ke lake.
Ati twa na gulitxuge, tanee tibira ulwiru Didza Xidza ka bekieru, ka bexsuaru, tanee.
Ki kabi tekabe yela yetxi guderu, tanee. Kabi nu uxhidxi lakabe, ki gakara kiekabe dxi’a tanee.
Kaa guka ati guzlo ruula Didza Xidza kieru. Len nazaa gubiernu ki Mejiku zii guzwe ga gúnne usule Xtidzaru.
Ni ki twa na bunatxi zian, be raban, lenka bëni, nigula, bedoo; iza’s bunatxi tibira taneka Didza Xidza.
Ati na’a yugu ka be kwidi tuwi’nikabe kabi busediki lakabe lei xuzxnakabe.
Yu’u balabe tadilabe o tupixhajkibe xuzxnákabe tu kabi bulwikine lakabe Didza Xidza.
Nazaa bunatxi zian narwajka ladziki, zwaka siwda yubla o yuguka pais yubla.
Yuguka bunatxi naa tadaka na’a tugilaj gax uliseda ki xuzxtoki. Twa na zwatu netuni rulwitu Didza Xidza.
Ki kaa yugu ka bunatxi na re’niki uliseda lei sekiki uliseda, ilakaka iline didza na guneka bënigula kiki.
Twa na runtu skwela ki Didza Xidza, ki gata tu lataj ga uluseda bunatxi te’ni ilaka iline Didza Xidza na.
Komu tu nakaru bëni yetxi doo tibi nu run bala xtidzaru. Tibi zwa ga tseajru skwela usedaru lei txa réniru gakaru ineru lei.
Karaka yazikala didza tanabee lu idzaliyú ni, rëëruka skwela ga usedaru leiki, o ga uluseda lei xhinka bunatxi.
Ati reo Bëni Xidza tibi nu zwa ulwi re’o xtidzaru, tibi zwa ga tseajru usedaru lei.
Tuz bedoo nakwakabe lu yëdzi kieru takabe tanebe lei. San bedoo dzëbe Lula’a o Zgita tibi de gaka ulusedabe didza kieru.
Txaba tanez lei xuzxnakabe walakabe lei; txa lake ululidze lakabe Didza Xidza.
Mala kaa, baniga ba run ilakabe Didza Xidza bedoo zwakabe siuda. Twa netuni rnatu ki rala swa skwela kierukaz ga usedaru xtidzaru.
Tibi rála gunru lëza gubiernu gune dxin na. Kwinru na kwekiru skwela kieru. Kaa naka ikiajlotu, ati twa na nakwatu rulwitu didza kieru.
Ba naka baniga ulwiru o usedaru Didza Xidza ka?
Baniga ba naka ulwiru xtidzaru komu tibi de ga usedaru ulwiru lei. Tibi nu zwa uzajni’i reo gakax ni’i ulwiru didza kieru.
Kun gudelakaza runa skwela ki na gula guzlawa iza galaj gaywa yu’u galaj. Tsawiladxi gunisida gakax ni’i guna ulwa’a lei.
Apu txi raka’a rulwa lei na’a, txi guzlo ribëë xbei ka runa skwela. Na guzlawa baniga ba beni neda, ni’i ka nësta bi inia, o bix guna.
Twa rwa’a yela xkalen ka yugu bunatxi na guda’ka lu kursu ni na gudelaza runa lei. Komu xkalenka bunatxi naa guyu’ lenda ruseda ulwa’a Didza Xidza.
Na’a dxi’a ba txi nësta gakax guna skwela ni. Kana gunia, tibi de ga usedaru ulwiru didza kieru.
Ni ka zwa ga ga’wiru tu libru gun yudar re’o. Tu gitxi ga zaaka leksion o ga zaaka jersisiu len yugu ka dxin gunru.
Karaka kati rusedaru didza Ingles o bipala didza tanabee lu idzaliyu ni, o karaka bëni gringu tusede didza Xtila, raka ta’wike tu libru ga ulusede didza naa.
Ati reoni tibi zwa ga txiiru libru guniru dxin txa nakaru maistru. Karaka geniru ulwiru sidza Xtila, waka txiiru tu libru ki didza Xtila ga ru’tike lei.
Yulajda ulwiru didza Xtila na len yugu ka libru na. Ati len xtidzaru tibi deka yugu libru naa.
Laz kaa raka kiekabe be tusedabe lei, tibi zwa ga ila’wibe libru ki ulusedabe.
Laska tibi zwa nu len gwikabe didza, tibi de gaka ulugunibe dxin didza naa. Ka raka kati rusedaru didza Ingles, raka ruyuru pelikula.
Iza’z yugu tu yu’u lu interne tu ruzenagaru, tu ruyuru, tu gun xdanru, tu kitajru. Len Didza Xidza kieru ga saa yugu twa.
Ati ni ki twa na rundzga baniga usedaka lei bunatxi, len laska baniga run ulwiru lei.
De ki uxhuxhaj ukinaj ikiajloru ki gakaru ulwiru Didza Xidza naa. Nazaa nupa teni uluseda lei rala ilinëz ki tibi naka yulajz.
De ki ulugilaj gaka ilun ki ilaka iline Didza Xidza kieru ni. Tsawiladxi re’ni tseajlenru lei.
Tu re’nitu guntu ki xën skwela ni
Netuni raka xbatu xën skwela kietu ni.
Renitu isalajtu masra grupu, renitu idxintu ga yuguka be na tenibe ulusedabe Didza Xidza ki ilidxinbe zitu, uluube xtsaa len didza na.
Raka xbatu idxintu ga ilikwa bunatxi ilaka iline Didza Xidza xkalen skwela kietu.
Twa zwatu rusedatu masra gakax gunru ulúiru ka bunatxi didza kieru.
Komu tibi naka tuz ka rizediru ineru Didza Xidza kati ralaj lenru lei len kati rusedaru lei txi guxhënru.
Nadzaa ka rusedaru tu didza rurupa rneru, deni gakax gunru ulwiru lei len usedaru leiki.
Dxin na rina ladxa guna nedaní, renda usedida bunatxi iline Didza Xidza. Nedani rinia ki waka ilikwa bunatxi kubi iline xtidzaru.
De bixpa gunru ki ilakabe ilinebe lei bedoo, ki iline lei bunatxi txi tanee tu didza yubla bilizediki kati nakaka bedoo we’n.
Twa na ridatu runtu skwela ki Didza Xidza, komu nëstu ki waka kieru.
Tibi naka yulajz, baniga naka, zian iza kiela ki ilakabe lei. Xtsei tseaj, tibi gakakabe lei txupa tsuna beoz.
Netuni rnatu ki tu skwela nakiniru ki utxisa uspanru Didza Xidza kieru, lei skwela na rdatu runtu.
Len tu skwela wazekiru usedaru ineru Didza Xidza, wazekika bunatxi uluseda len iline lei.
Wadxin tu dza ga yugube skwela kietu walinebe Didza Xidza, kaa raka xbatu.
Naza neda, zeja ruseda masra; rinësta masra len dxin ni runa. Yu’u gadxi xunu iza zitera txi raka’a ulwa’a Didza Xidza.
Zitera txi naba’a xtxina len raka xba txi guxën skwela ni nazaa txi dzë’ë bunatxi txi tanee Didza Xidza xkalen skwela kia.
Ni ki gulizwa buliseda lei len nedani. Kaa naka tu renda guna.
Nazaa renda ki yugu be tenibe ulusedabe iligixhajbe, kaa kabi guni looru gubiernu o swa nu gun re’o yudar len dumi.
Kwinru na rala gunru skwela kieru. Kiezru gunru lei.
San txa tsalizu zwaru runru lëza gubiernu, yugu skwela ki gubiernu, o nupala ululwi Didza Xidza kieru tibi sekiru utxisa uspanru lei.
Wadxin dza ga úlaz kaa txa kabi bee ladxiru lei reo kwinru.
Twa na tibi rida rigilja dumi ki gubiernu o nu gun neda yudar, o nula kixhaj neda ki kaa tibi laxaj skwela kia tsu’u.
A’a. Neda rinia ki be tenibe ulusedabe rala iligixhajbe, ki kaa gala skwela na len xën.
Nazaa gaka gunru tu re’niru, kabi kwabi reo nula zwa runa dumi ki gunru dxin na. De ki tsu’ loru ki re’o naka lu naru xtidzaru.
Lu naru naka txa ula o waline lei bunatxi yu txidaa txìnu gaywa gaywa iza kati na’a.